Det vart ein tidleg start for oss i dag: Toget var framme 05:41 lokal tid, og regnet hølja ned. Det var såpass ille at vi venta nesten ein time på stasjonen før vi tok sjansen på å gå ut.

Hovudgrunnen til at vi stoppar i Irkutsk, er at det er eit land i spelet Risk. Eit land som eg, av ein eller annan grunn, alltid ender opp med å ha ti kanonar i. Med eit slikt nært og tett forhald til «landet», måtte vi jo stoppe!

Irkutsk er dobbelt så stor som Oslo, og er ein verkeleg sjarmerande by. Mange trehus, som ser ut akkurat som hus i gamle western-filmar. Biletet over er huset til ein av «desembristane» – dei som organiserte opprør mot tsaren i 1825. Desembristane vart forviste til Sibir, og vart pionerar innan utdanning og vitskap i dette området. Det er haugar av minnesmerke for desembristane over heile Sibir.

Seinare i dag skal vi vidare til Listvjanka, ein av landsbyane attmed Baikal-sjøen. Eg har lyst til å dra vidare til Olkhon-øya, men Vidar er litt skeptisk  trur eg… Olkhon er ein av dei fem globale «polane» med sjaman-energi i fylgje Burjat-folket. Høyrast spanande ut!

Tips oss hvis dette innlegget er upassende